38,000尺超豪會所

上個星期六去灣仔輝記食飯，發覺原來坐落一檯二檯都係d 0岩0岩去完灣仔新盤"尚X峰"既睇樓人仕。

阿媽呢期已經響度投訴，話去灣仔街巿買野時成日比"尚X峰"班地產經紀截住，好煩咁話。

唉，以"尚X峰"響過去3日假期只係賣左40伙既銷情黎睇，阿媽應該有排煩咯。

望落班睇樓人仕，好似大部分都好街坊咁，似係同區換樓客。如果睇外形，好多都係其貌不揚既叔叔嬸嬸。都唔明點解，聽落佢地d對話，走去灣仔街巿買6-7千蚊尺既"尚x峰"同走去灣仔街巿買條蔥，感覺上都冇乜分別，好似都係唔使點諗咁。

講到呢度，忍唔住又想講多兩句香港樓巿。其實我都唔想講第三次，不過香港d發展商實在太離譜、而香港繼續沉淪響用地產呢樣毒品去刺激經濟又實在太不智，所以作為香港人實在有義務去揭示一下香港樓巿既荒謬之處。

話說經過"尚x峰"個盤，見到佢大大隻字寫住有"38,000尺超豪會所"，作為樓盤既主要賣點。

嘩！乜"38,000尺超豪會所"係賣點黎既咩？乜唔係缺點黎既咩？

就好似你去買衫，個老闆同你講：「見同你咁好傾，計你貴d丫？」。

我自己就覺得呢兩句說話冇乜分別喇。

點解咁講？話說住宅既面積可以分為3種，而以香港地產商既標準，係會將佢地咁定義既：

1. 地毯面積：可以舖到地毯既面積，即係最接近買家可以運用既空間既計算方法。

2. 實用面積：地毯面積 + 牆身厚度、窗台、冷氣機房

3. 建築面積：實用面積 + 公用地方(例如會所、升降機大堂、管理處、平台花園、每一層既樓梯、渠位、電梯槽、天台、看更亭等)。亦即係差唔多只要係平面、用石屎既地方就可以加入建築面積！

地產商同傳媒只會提(2)同(3)，但係(1)就從來都冇人會比資料，不過普遍估計以而家新樓既高度，牆身通常較厚，將"實用"面積再打多8折就差唔多喇！
嘩！新樓實用率已經夠低、得8成左右架啦！仲要打多8折？咁咪得番64%？！

即係話六千五蚊尺既新樓"豪宅"，如果計地毯面積咪即係超過一萬蚊一尺？！

嘩！成萬蚊尺買間豆腐潤咁細既街巿"豪宅"？唔係下0麻！

我諗新樓除左唔使用遙控、坐響梳化伸直隻腳就可以用腳趾公開著部plasma電視呢點係比較方便之外，都冇乜其他優點咯…

以我所知，1985年前《中英聯合聲明》簽訂之前所起既樓d空間係見使好多既，所以而家想買樓既話，買21年樓齡或以上果d會好d。一則夠大、二則冇新樓溢價、三則管理費低、四則用料好d。

唔知"尚x峰"住戶響夜晚嫌迫挾，係咪可以搬落個38,000尺超豪會所度訓既呢？如果係又真係幾豪既…

* * *

後記：原來我低估左香港d發展商... =P









* * *

後記2 (12-11-06)：無線關於面積計算既節目

http://www.youtube.com/watch?v=7M0fJjWeOIw